Fuat Yaman
Wexto ke wisar yêno welat, vewra koyan giran-giran helîyêna. Awa vewre dere bi dere û dol bi dol herikîyêna, resena layan û çeman. Welat de sey emserên de ge-ge zimistan çetin û zehmet beno; o wext merdim qayîl o ke wa wisar leze-bez bêro.
Zimistan de merdimî, sey heywananê xozayî, kewenê keyeyanê xo. Bêguman ma zî kewenê zerrîya keyeyî; la merdim nê tengayan ra zaf hes nêkeno. Coka zimistan hetanî yew ca rind o, la tehmê xo ke vîyarna, beno pîser.
Şarê ma wisarî ra zaf hes keno. Rast o, wisar sewbîna rind o. Xoza xo xemilnena; darî vilan akenê, herre ra yew ciwîyayîş berz beno. Her tar û waş reyna rîyê xo tadanê roje û vilanê rindan danê teber. Koyî reng bi reng xo xemilnênê. Tîja berqîyaye heme ca keno germ; na germe kewena herre û çiqas kerm û kêzî estê, vejîyenê teber. Her kes semedê rizqê xo gêreno. O wext ma zî semedê taran koyan de gêrenê. Nameyê nê waşan semedê ma zaf muhîm o, çunke nameyê nê waşan tarîxî yê.
Çira tarîxî yê?
Wexto ke merdimî gamanê xo eştê na dinya ser, ma yewbînî rê bîyê hewal. Ma nê waşan ra zaf feyde dîyo. Demêk ra pey ma nameyî dayê înan. Waşî û tarî, ma merdiman ra hîna verê cû na dinya de cayê xo girewto. Însanî mîyanê koyan de semedê nê waşan bîyê pisporê xozayî. La ma hende lez nêbîyê pispor. Tewr verê de, ma heywanî teqîp kerdî û ma înan ra zaf çîyî bander bîyê/musayî. Badê cû ma bander bîyê/musayî ke kamcîn waş werên o û kamcîn waş ma rê zirar o.
Ma nê waşan rê nameyî dayî û her nameyî de yew manaya xorinî nimitîya. Tayê waşî semedê werdî bîyî, tayê zî semedê dermanî. Ma nê nêmetê xozayî bi serran ceribnayî û kerdî mîrasê xo.
Zanayîşê ma û xoza
Zanayîşê ma yê serê taran, tenê mase ser o nêameyo kerdiş; no zanayîş bi çewres dewr û dewrê merdimatîye, bi gerayîşê koyan û bi deşta herre de ameyo arêdayîş. Wexto ke ma vanê kenger, kardî, xazîk yan zî sîrê koyî, ma tede bîranînanê kalikanê xo û vîrê miletê xo vînenê.
