Akademî Sûr Merkezê Etudî, Akademî Huzurevleri û Akademî Çermûg de ke binê banê Mudirîya Şûbeyê Perwerdeyê Ciwanan a Serekîya Daîreya Xizmetanê Komelkîyan de xebitîyenê, demê perwerde û musnayîşî yê 2026-2027î dest pêkerd. Akademîyan de ke bi fehmê perwerdeyê seypê, bikalîte û bêpereyî xizmet danê, bi taybetî ciwanê dezavantajî ke xo seba îmtîhananê lîse û unîversîte amade kenê, piştîdayîşê perwerdeyî gênê. Wendekaran dersa verêne ya demê neweyî de perwerdekarê xo dîyî û dest bi xebatanê xo kerd.
Dersan ra teber rayberîye û çalakîyê komelkî
Akademîyan de dersan ra teber, seba piştîdayîşê wendekaran ê averşîyayîşê akademîkî do îmtîhanê ceribnayîşî, xebatê rayberîye û bernameyê etudî bibê. Ney ra teber seba averşîyayîşê înan ê komelkî û kulturî do sezonê perwerdeyî de çalakîyê cîya-cîyayî bibê.
200 wendekaran waro ke waştbî, qezenc kerd
Mudirê Şûbeyê Perwerdeyê Ciwanan Erhan Kartayî dîyar kerd ke akademîyan par 500 wendekaran rê piştîdayîşê perwerdeyî dayo. Kartayî vat: "Nê 500 wendekaran ra Akademî Sûr de grûba YKSyî de nêzdîyê 200 wendekaran waro ke waştbî, qezenc kerd. Akademî Huzurevleri û Akademî Çermûg de zî wendekaranê LGSyî ra bi pêroyî 60 wendekaran dibistano ke waştbî, qezenc kerd. Ê resayî amancê xo."
550 wendekarî do perwerde bigîrê
Kartayî îfade kerd ke emser 550 wendekaran qeyd kerdo; înan ra 350 kesî Akademî Sûr de, 200 kesî zî Akademî Huzurevleri û Akademî Çermûg de do perwerde bivînê ke seba wendekaranê grûba LGSyî xizmet danê.
'Amancê ma perwerdeyo bikalîte û bêpere yo'
Kartayî bale ante ser o ke amancê esasî yê akademîyan o yo ke piştî bidê perwerdeyî yo bêpere û bikalîte û vat: "Amancê ma temînkerdişê perwerdeyê bikalîte û bêpereyî yo. Amancê ma yo verên o yo ke ma biresê wendekaranê ke halê înan ê sosyoekonomîk baş nîyo, înan perwerde bikerê û piştî bidê înan."
Wendekaran rê kitab û etudê bêpereyî
Kartayî îfade kerd ke akademîyan de îmkanî sey dezgeyanê perwerdeyî yê xusûsîyan yenê dayene û vat: "Sinifanê ma de texteyê biaqilî est ê, ma materyalanê perwerdeyî yê tewr rindan xebitnenê. Ma kitabanê bêpereyan danê. Odeya etudî û odeya enformatîkî est ê. Ney ra teber servîsê rayberîye yew bi yew wendekaran reyde eleqedar beno."
