Qezaya Maltepe de 3 qatê verênî yê awanîya 7 qatine rijîyayî. Badê rijîyayîşî zaf kesî bi xo awanî ra vejîyayî, la hemwelatîyê ke keyeyanê xo yê hîrê qatanê verênan de bîyî, binê xirbe de mendî. Badê serebûdî ekîbê weşîye, îtfaîya û AFAD’î şîyî û dest bi xebatanê xelasnayîşê kesanê binê xirban kerd.
Goreyê melumatan, Walîtîya Îstanbulî dîyar kerd ke tewr kêmî 33 kesî awanî de ciwîyayêne. Wezîrê Karanê Zereyî Mustafa Çîftçîyî dîyar kerd ke 11 kesî binê qatanê rijîyayan de mendî. Ame dîyarkerdene ke înan ra 2 kesî ganê xo ra bîyî, 10 kesî zî, 3yê înan doman ê, bi birîndar ameyî vetene. Cigêrayîşê 2 kesanê bînan dewam keno.
Sebebê rijîyayîşê awanîye nêame zanayene. Goreyê melumatan, 3 qatê awanîye qaçax ameyî viraştene. Derheqê serebûdî de tehqîqat ame destpêkerdene.
