Mehmet Ay
Yew hewte verê ma qalê nêweşîya ma yê psîkolojîkan kerd. Eno hewte zî ez reyna binusî. Ma qalê telefone û televîzyone kerd û ma va ke însanê ma nêwanenî, semedo ke nêwanenî nêzanî û çi waneno zî vano qay raşt o.
Tîya ra 150 serrî verî Zanyar Sîgmund Freud vato ke "Mêzgê însanî di qisim o. Qisimo verîn hîş (bîlînç) o, qisimo diyin zî binhîş/binêhîş(bilinçaltı) o.
O çîyo ke ma fehm kenî, ma vînenî, ma eşkenê serê ey de tesîr biker ra ma vanê hîş. Eke ma nêeşker serê ey de tesîr biker ra yan zî kontrolê ey destê ma de nêbo ra zî vanê binhîş/binêhîş.
Binhîş/binêhîş ser o de têsîrê ma çin yo yan zî hayedarê ey nîyê labelê têsîrê ey ma ser o est o.
Telefone û televîzyone ro ma hayedar nîyê la înan cuya ma zaf bedilna, înan keyeyî xerepnayî. Instagram, Facebook, Twitter însanî rayîr ra vetî. Înan ra vanê medyaya sosyale(labelê sosyalîya însanan xerepnenî û însanan hepsanê bêdês û bêcaxan de kenê hepsî, kenê kole. Kulturan bedilnenê miletan asîmîle kenê û heme çî ra wet serdestan ro xizmet kenê.)
Ti vajî faydeyê înan qet çin yo? Helbet est o labelê zirarê înan faydeyê înan ra zêdeyêr o. Enê binhîşê/binêhîşê ma bi çîyanê nebaşan dekenî. Mesaj danê binhîş/binêhîşê ma û ciwananê ma xerepnenî labelê yew raştîye zî est a ke êdî însanî sereyê xo telefone ra hewa nênanê. Kelamêke çi kes xeberî nêdano. Yew halê kesî nêperseno. Telefone û televîzyone de çi vîneno sey înan keno û sey yê înan wazeno. Ez vana qay 15 serrîna badê ma êdî tutan û ciwananê xo neşinasne. Çi heyf...
Paweyê Homayî bibên.
