Ekîbanê polîsan şefeq saete 04.20 de eşt Grûba Medya ya Sozcu ser. Heme rayîrê ke şinê verê bîna ameyî padayîş û zaf polîsî mîyanê bîna de cigêrayîş kenê.
Qeyûm ame tayînkerdiş
Ame zanayîş ke qerarê tayînkerdişê qeyûmî Sözcü TV û keyepelê Sözcü.com.tr gêno xo mîyan. Rojnameyê Sözcü, Tavır û Korkusuzî yê ke aîdê eynî grûbe yê, înan rê qeyûm nêame tayînkerdiş.
Îdarekarî ameyî tepiştene
Nuştoxê rojnameyê Sozcu Îsmaîl Saymazî aşkere kerd ke polîsî ameyê bînaya televîzyonî û cigêrayîş kenê. Saymazî da zanayîş ke Fonê Sîgortaya Mewdûatê Teserrufî (TMSF) kanalî rê qeyûm tayîn kerdo û Serekê Heyetê Îdareyî Funda Tuncer Sıdalı ameya girewtiş. Mîyanê kesê ke ameyê tepiştiş de Midûro Pêroyî yo verên Asım Akgül zî esto.
Avûkatê Grûba Medya ya Sozcu Ersan Barkınî îfade kerd ke cigêrayîş dosyaya ke verê cû hetê mehkemeya berze ra ameya tesdîqkerdiş ke tede sûc çin o ser o yeno kerdiş û wina vat: "Hetê Serekîya Dozgerîya Komarî ya Îstanbulî ra, dosyaya ke Yargıtayî verê cû xirab kerdbî, tede bêhuqûqî nêdîbî û tesdîq kerdbî ke sûc nîyo ser o Grûba Sozcu de cigêrayîş yeno kerdiş. Qerarê qeyûmî nika tena Sözcü TV û Sözcü.com.tr gêno xo mîyan."




