Paytextê İsveçî Stockholm de Serekê Meclîsî (Riksdag) Andreas Norlénî konferansê çapemenîye viraşt û eşkera kerd ke peyê weçînayîşê 13ê êlule de wezîfeyÊ awankerdişê hukumetî reyna dayo serekwezîra verêne Magdalena Anderssone.
Norlénî da zanayene ke proses heta 12ê teşrîna verêne yo û Andersson eşkena reyna wezîfeyê xo peyser bido yan zî wexto zêde biwazo. Persê ke “Çira no wezîfe nêdîya lîderê Muhafezakaran Ulf Kristerssonî?” ser o zî Norlénî va ke şertê sîyasî yê meclîsî reyna seba Anderssone munasîp ê.
Anderssone zî pare kerd ke na biryare ra keyfweş a û do peynîya hewte de planê hevdîyînê xo hadre bikero. Anderssona ke 28ê êlule de wezîfe peyser dabî, bi na biryare reyde rey de diyîne wezîfeya ronayîşê hukumetî girewte ser milê xo.
Parlamento de ferqê hîrê kursîyan esto
Weçînayîşê 13ê êlule de blokê çep-merkezî ya bi lîderîya Sosyal Demokratan parlamentoyê bi 349 kursîyan de 176 sandalyeyî vistî dest; blokê rastgire zî 173 sandalye de mend.
